اسكريبت رمضان كريم بقلم ايمان شلبي

لاول مره في حياتي !
مكنتش اعرف اني عندي الموهبه دي غير لما حبيته
بيبقي في كلام كتير نفسى اقولهوله لكن مبقدرش لانه محرم
كنت بكتبه في الروايات وكأني بهديها ليه يمكن يقدر يفهم احساسي وقد ايه انا حبيته
يمكن يقدر يفهم قد ايه انا اتعلقت بوجوده وحسيت معاه بالأمان اللي عمري ما حسيته في شخص تاني غيره
فضلت اكتب واكتب واعتقد هفضل اكتب كل الكلام اللي في قلبي علي هيئه روايه لحد ما يجمعنا بيت واحد
وقتها بس هقدر اقوله كل الكلام اللي في قلبي بدون خوف أو خجل
وقتها هنكون كيان واحد
اتنهدت وانا بنهي الروايه اللي بكتبها وبحفظها عندي في الفون

وقتها الفون اتهز بماسدج فتحتها لقيتها منه
افتحي الباب 
ليه
افتحي وانتي تعرفي بس لو سمحتي البسي طرحه قبل ما تطلعي عشان لو حد طالع
حاضر
قومت لبست طرحه وخرجت فتحت الباب واول ما شوفت اللي علي الارض ابتسمت بفرحه وانا باخده
كان بوكس كبير جدا ومكتوب عليه
رمضان كريم 
دخلت اوضتي وحطيته علي السرير وفتحته
كان جواه بلوره بوجي و طمطم وفانوس اسود شكله يخطف القلب
واسفنج وشرايط متلونه وشوكلت كتير وفوقيهم كان حاجه زي الطرحه
مفهمتش ايه دي غير لما فتحه
كان خمار لونه بيبي بلو وجواه كارت مكتوب عليه
عرفت انك عايزه تلبسي خمار قولت اشجعك
عيوني لمعت بالدموع وانا بقرب من المرايه وبحط الخمار علي راسي
وفي الحقيقه كان شكله يجنن 
ابتسمت وانا بهمس جوايا 
ربنا يخليك ليا
فتحت الفون وبعتله ماسدج
شكرا يا يوسف
العفو اتمني تكون عجبتك 
جدا وعلي فكره انا هلبس الخمار من بكره 
فرحتيني جدا ربنا يثبتك 
يارب 
بعد مرور سنه
بارك الله لكما وبارك عليكما وجمع بينكما في خير وعلي خير 
قالها المأذون في كتب كتابنا 
وقتها قلبى رقص وعيوني لمعت بفرحه
مكنتش أتخيل أني ممكن احب شخص كل الحب ده !
كان حب من نوع خاص 
شخص قابلته صدفه 
قلبي حبه بدون أراده 
دعيت ربنا يكون من نصيبي 
واهو دلوقتي حلمي ليتحقق
هتمني ايه اكتر من كده 
قرب مني وباس راسي برقه 
مبروك
رديت بخجل 
الله يبارك فيك 
طب ايه 
ايه
ابتسم ومسك ايدي وهو بيبص في عيوني 
مش هسمعها منك بقي 
ايه هي 
مش هتقوليلي بحبك
ابتسمت وحطيت وشي في الأرض وانا بهمس بخجل 
بحبك
باس ايدي برقه 
وانا كمان بحبك
ما بعد سنين من التوهه ومن قلة أمل خدني 
يشاء ربك يعوضني 
وتيجي حياتي تمليها امل وحنان 
تمت 
إيمان_شلبي